Quenes somos¿?

~A nosa música de Onte e de Hoxe~

Onte e Hoxe é unha agrupación músico-cultural nada no ano 2015, como trío. O pouco tempo incorporouse Anxo como o seu percusionista. Onte e Hoxe comezou cunha ilusión, a de recuperar aquela música que nos abriu paso ao que temos hoxe en día. O noso repertorio é amplo e contén temas da música galega dos anos '60 e '70 e tamén cancións de grupos de tendencia na actualidade galega. O noso fin é ir camiñando por nós mesmos pero sen esquecer as nosas raíces, tentando deste xeito divulgar e recordar o que nos une como galegos!!!

Roberto

Roberto Fdez. Lores.- Voz. Vilalonga (Sanxenxo) 1970 – 1974 : Coro dos Institutos de Pontevedra. 1974 - 1979 : Orfeón Terra a Nosa de Santiago de Compostela. 1980 – 1995 : Coral Polifónica de Vilanova de Arousa. 1980 – 1981 : Orquestra “CONCORDE”. 1985 – 2016 : Grupo “CREMALLERA” – Vilanova de Arousa 1995 : Colaboración con “CANTIGAS E AGARIMOS”, para gravación de disco, como solista do “Alalá de Padrón”. 2013 – 2016 : Orfeón de Voces Graves Arousa. 2014 - 2015 : Coro Liceo de Vilagarcía de Arousa. 2015 : Participación no Musical “Valansiyya”, facendo o papel de "Muetzin".

Itziar

Itziar Solla García é a frautista do grupo. Natural de Vilalonga, comezou os estudos de música moi nova, aos 5 anos tocaba as súas primeiras pezas ao piano. Máis tarde pasou a formar parte da agrupación cultural Os cruceiros de Vilalonga onde ademais de bailar tamén cantaba e facía repenica-la pandeireta. Anos despois comezou a tocar a frauta traveseira na Escola de música municipal de Sanxenxo e cambiou unha agrupación por outra. Foi entón cando comezou a tocar na Banda de Música de Sanxenxo, da que é membro fundador e segue a formar parte na actualidade. Ampliou os seus estudos musicais no Conservatorio Profesional Manuel Quiroga. Como músico participou en varios certames de bandas, actuou coa súa agrupación en programas da TVG e da TVE e tocou baixo a batuta de importantes mestres. Ademais, na actualidade compaxina a súa actividade na banda de música e no noso grupo coa labor docente impartindo clases de música e movemento aos máis cativos en varias escolas.

Victor

Víctor Bóveda Prado é o guitarra do grupo. Procedente de Vilanova de Arousa, comezou o contacto coa música da man do seu avó con 6 anos. Posteriormente cursou os seus estudos de música no Conservatorio Elemental de Música de Cambados coa especialidade de guitarra. Máis adiante comezou a súa andaina coa Orquestra de Pulso e Púa “Arousa” mentres continuaba os seus estudos de guitarra no Conservatorio Profesional de Música de Vilagarcía de Arousa. Con 15 anos uniuse ao Grupo Cremallera, grupo de serenatas. Pouco despois marchou a continuar o Bacharelato a Bloomington, IN (EUA) onde se uniu á coral do instituto “Sounds of South”, BHSS mentres continuaba os seus estudos de guitarra co mestre serbio Nemanja Ostojic. Ao voltar das Américas, enrolouse coma director musical da Comparsa “Os Golfiños” de Vilanova de Arousa e continuou os seus estudos musicais ata comeza-la carreira de Enxeñería de Telecomunicións na Universidade de Vigo, onde cantou durante dous anos no Coro Universitario de Vigo. No último ano, uniuse ao Orfeón de Voces Graves de Arousa e participou como solista no musical “La vida es magia”, baixo a produción da escola de canto e baile “Nydia”. Actualmente, continúa os seus estudos superiores compaxinándoos coa sua paixón pola música

Anxo

Anxo Xesteira Serrano é o encargado de poñer o ritmo. É de Cambados e comezou coa música con tres anos, xunto co seu irmán, xogando a ser Treixadura. Co paso do tempo,a música deixou de ser un xogo e empezou a estudar solfexo e piano coa súa avoa. Aos 8 anos comeza no Conservatorio Elemental de Música co acordeón e con 10 anos comeza a tocar a gaita na casa. Forma así un cuarteto tradicional:"Os Xeitosiños", xunto co seu irmán, tamén á gaita, o seu primo ó tamboril e un amigo ó bombo. Ao mesmo tempo, entra como percusionista na Banda de Música de Castrelo e na Banda de Música Municipal de Ribadumia.Tamén participou co coro parroquial de Cambados ao piano, coa gaita, a percusión e cantando. Ao rematar o Grao Elemental de acordeón, fixo o último curso do Grao Elemental de piano, obtendo así os dous títulos elementais. En outubro de 2014 forma parte do grupo de Rock "Cabina 402" como batería. Participou con cantautores como Xoan Silva e Blas, co rockeiro Isi Vaamonde e con grupos como Son de Seu ou Treixadura. Actualmente, cursa o grao profesional de acordeón e continúa con "Os Xeitosiños", e como non, con "Onte e Hoxe".

Novas